الجمعة 19 أبريل 2024 - 13:01وليد فواز لـ"محمد رمضان": الاعتذار من شيم الرجال يا صاحبي
11:54 ص - الإثنين 23 نوفمبر 2020
كتب
كرستين سامى
محمد رمضان
وجه الفنان وليد الفواز نصيحة لصديقه الفنان محمد رمضان، عقب الضجة التي ثارت بسبب انتشار صورة له مع أحد المطربين الإسرائيليين.
وقال وليد الفواز عبر حسابه على موقع الصور إنستجرام :" محمد إزيك فعلا واحشني.. محمد رمضان الطموح الموهوب اللي قابلته في بداية الطريق، محمد اللي لما عمل احكي يا شهر زاد في موقف الإسعاف وقالي فواز انا نزلوا صورتي علي الافيش (إحنا هنبقي نجوم جامدين يا له) بس إنت الأجمد الآن، واحشني محمد اللي كان بييجي يتفرج عليا في مسرح الشباب ويبدد بحماسه و طاقته التي لا تنضب بالأمل أي شعور بالإحباط عند أي حد بيشوفه، محمد اللي واحشني هو محمد اللي في الصورة دي أنا حابب أحط الصورة دي أكتر من أي صورة تانية ليك دلوقتي".
وتابع قائلاً:"لو الناس كلها قالت إنك اتغيرت ميخصنيش لأني عارف إنت مين وقد إيه كنت جدع معايا.. محمد اللي انت وصلت له، ولسه هتوصله كمان فعلا تستاهله لأنك مميز وقبولك رباني واسمحلي يا صاحبي العنيد واللي أعرف عنه من زمان إن دماغه أنشف من الحجر ولا يسمع إلا عقله فقط، أطلب منك أن تعيد النظر في اللي حصل عشان خاطر جمهورك الحقيقي "الناس" مشاهدة نصبتك ملكا متوجا علي قلوبهم الناس اللي شافت فيك الأمل، بص من منظارهم للحكاية، بعيدا عن أي "مزايدات" "فيه خطأ حصل واللي حصل حصل وخلاص وانت كبير وناضج وأب ورب أسرة وعارف ايه الصح وايه الغلط" .
وأضاف وليد قائلاً :"لكن يا صاحبي الاعتذار من شيم الرجال، ولا يقلل منك أبدا فكر يا محمد عشان خاطر جمهورك الكبير وموهبتك، محمد انت ذكي جدا وهتعرف نفسك وتحط إيدك علي الصح، ربنا يعديك من المحنة دي علي خير.. رفيق الرحلة فواز" .
