فتحى عبدالوهاب يتحدث لـ"الشورى:" "القاهرة كابول" تعب صحتى بسبب التدخين

خالد الصاوى يستحق الكأس.. وطارق لطفى السوبر.. وأنا الدورى

طارق كساب تركيبة من شخصيات إعلامية مختلفة فيها كل الاتجاهات والأفكار.. وليس يسرى فودة فقط

ربنا يقدرنى وأسيب ولو بصمة بسيطة بأدوارى الناس تفتكرنى بيها مثل الأساتذة الكبار

يرن جرس التليفون عام ٢٠٠٢ لأجد صوتا رخيما يبدأ المكالمة بعبارة مساء الخير يا أستاذ.. أنا مش عارف أقولك إيه وأشكرك إزاى على اللى انت كاتبه .. ده كتير أوى عليا.

المكالمة كانت من النجم فتحى عبد الوهاب ووقتها لم يكن بيننا سابق معرفة سوى أننى شاهدته فى مسرحية مع النجم يحيى الفخرانى وكتبت عنه بمنتهى الصدق ووقتها كان فتحى من نجوم الشباب لكنه من وجهة نظرى كان الأكثر موهبة وثقافة ووعيا لرسالته كفنان وممثل يعرف كيف يصيغ أدواره ويختار أعماله التى يصنع من خلالها بصماته.

دائما ما يبهرك بأفكاره ووجهة نظره التى أستمتع بالاستماع لها كلما تقابلنا لذلك أعتبر شهادتى فى فتحى عبد الوهاب مجروحة لأنى أرفض الحياد معه أو مع المختلفين عليه.

هذا العام وبالتحديد فى موسم رمضان قدم لنا فتحى عبد الوهاب عرضا فنيا ثقافيا جديدا فى مسلسل القاهرة كابول الذى حصد نسب مشاهدة كبيرة ونجح فى المنافسة مع أعمال كبيرة تم تقديمها هذا الموسم وبالفعل لاقى المسلسل استحسان النقاد والجمهور الذى استمتع بمشاهدة عمالقة فى التمثيل يتنافسون فى مشاهدهم على البساطة والأداء الراقى لينجح كل واحد منهم فى حصد آلاف الأصوات التى تعلن إعجابها بما تم تقديمه.

تحدثت مع فتحى عبد الوهاب وهو قليل الكلام إعلاميا وكان اتفاقنا أن نتحدث فى حدود الصداقة وعلى الهامش ندردش بشكل فنى عن موسم رمضان ومسلسل القاهرة كابول وخطط المستقبل.

فى البداية لابد أن نتعرف على كيفية اختيار فتحى عبد الوهاب لأعماله والإجابة هنا كانت أنه يختار الدور الذى يصدقه عندما يكون مكتوباً فى سياق فنى واقعى ويستطيع كقارئ استيعابه وهو معيار مبدئى بعد قراءة الورق أما المقياس الأهم فهو عدم تباعد المسلسل أو الفيلم عن الجمهور ولا يقصد المعنى المتعارف عليه للتباعد وإنما هناك أعمال فنية تتجاوز الذوق الفنى الطبيعى للجمهور وبالتالى يشعر كمتلقٍ بذلك وهذا ليس تقليلاً أو انتقاصاً ولكنه يفضل وجود تفاعل عند المشاهدة حين يقدم عملاً يكون قريباً ومفهوماً.

قاطعته لأسأله عما يتخيله البعض من كونه فنانا مثقفا ويتوقع الكثيرون منه التعمق والتدقيق الزائد فى الشخصية التى يقدمها.. فيرد ضاحكا: مش عارف الناس ليه شايفانى أفلاطون أو سقراط.. ثقافتى فى الآخر لنفسى لكن الأدوار اللى باختارها لازم تكون قريبة من الناس .. البساطة أكتر حاجة استفدت بيها من الثقافة وطول ما الواحد عايش بيتعلم وبيقرأ وبيتابع علشان يزداد بساطة مش العكس خالص.

أيوه يا فتحى بس انت فى نظر البعض " الجوكر" أو فانديتا مثلا كممثل وقائد رأى؟

يضحك مرة أخرى ويقول: على فكرة دى وجهة نظر أنا باحبها جدا ومبسوط بشكل غير عادى لأن فيه ناس شايفانى كده وبالعكس أنا شايفه شرف كبير أن أكون قائد رأى وربنا يقدرنى وأسيب ولو بصمة بسيطة بأدوارى الناس تفتكرنى بيها زى أساتذتنا اللى اتعلمنا منهم وبفنهم.

تعال نتكلم شوية عن كمية التدخين فى مسلسل القاهرة كابول مع إنى عارف إنك أقلعت عن التدخين من فترة طويلة؟

للأسف طبيعة الشخصية كده وأنا مقدرش أغير فى ورق الأساتذة مهما كان فيه ضرر شخصى لأنى اتعلمت احترام كل كلمة بذاكرها وباوافق أقولها.. طارق كساب شخصية صعبة جدا ومليئة بالمتناقضات علشان كده بدأت معها بالقراءة المتأنية أكثر من مرة، ثم معالجة الشخصية وكيفية نشأتها وحياتها الاجتماعية، وعلاقتها ببقية الشخصيات خصوصا أن النجوم الموجودين بالعمل مثل طارق لطفى وخالد الصاوى والأستاذ نبيل الحلفاوى أعمدة تمثيل وحيتان مذاكرة ودراسة للشخصيات، والتدخين كان أساسى لشخصية كساب لدرجة إن فيه مشهد اتبنى على فكرة تدخينه أمام طارق لطفى اللى اعتبر نفسه أمير المؤمنين فى المسلسل طبعا وقاله ابقى افتكر إنك شربت سيجارة مع الخليفة. - أكيد لو حاولت آخد منك تصريح بالتشابه بين طارق كساب ويسرى فودة هنفضل قاعدين لغاية ما نطلع معاش؟ - يضحك بصوت عالٍ ويقول: مش لازم يكون هو ومش لازم يكون مش هو! - ما أنا قلت لك من الأول أنا حافظ الإجابة؟ بص علشان نرتاح كلنا خلينا نعتبر إن طارق كساب تركيبة من شخصيات إعلامية مختلفة فيها كل الاتجاهات والأفكار، فى جزء من الخيال طبعا ، جزء تانى حقيقى وهو شخصية تشكل الإطار العام للإعلام فى فترة زمنية تزيد على عشر سنوات.. كل شخص من حقه يشوف الشخصية زى ماهو عاوز وفى الآخر هو شخصية درامية تمر بأحداث كثيرة ممكن تكون أى إعلامى موجود فى نفس الفترة. من هو البطل الحقيقى للقاهرة كابول فى وجهة نظرك ؟ المؤلف عبد الرحيم كمال طبعا.. الوحيد اللى عرف يجمع ٤ فئات مختلفة من المجتمع .. فن ودين وإعلام وسلطة وربط بينهم فى عمل.. واحنا كفنانين قدمنا وجهة نظر كل واحد بطريقته.. الأستاذ عبد الرحيم كمال رصد بدقة الواقع ونجح فى خلط التوليفة الدرامية التى تجمع الأسرة حولها وقت العرض وطبعا المخرج الأستاذ حسام على اللى حط بصمته الخاصة فى الورق وعلى الشاشة وفى أدوارنا وأدائنا جميعا. وفى رأيك ما الذى ربط بين الأربع فئات خلاف العمل الدرامى؟ - بص .. الرابط بسيط هو إن الأربعة اتولدوا فى نفس العام ، وعاشوا الظروف الاجتماعية نفسها معا، وفى العقار نفسه، وحلموا مع بعض والاختلاف إن كل واحد منهم حقق حلمه بطريقته اللى اختارها. مباريات التمثيل بينك وبين طارق لطفى وخالد الصاوى انتهت لصالح مين؟ انا أخدت الدورى وخالد أخد الكاس وطارق أخد السوبر.. يضحك مجددا ويقول: مش متخيل أنا كنت مستمتع قد إيه بالتواجد مع كل من شارك فى القاهرة كابول.. كنت باتعلم منهم كل يوم حاجة جديدة واللطيف إنك لما بتشتغل مع ناس فاهمة ومحترفة بتبقى مش عايز الشغل يخلص بالعكس.. فعلا استمتعت جدا لدرجة إن كلنا كنا بننسى إننا بنمثل وعشنا أدوارنا كأنها شخصياتنا الحقيقية ، ولعلمك تقريبا لم نلتق كثيرا أثناء التصوير يعنى أنا قابلت خالد ثلاثة مشاهد وتقابلنا نحن الأربعة فى مشهد واحد، وتقابلت وطارق فى أربعة مشاهد لأننا خطوط متوازية فى المسلسل.

وطبعا لا أنكر أن من الحاجات المهمة أو الرائعة التى حدثت لى أننى التقيت وخالد وطارق وفيه صداقة قوية تربطنى بهم منذ سنوات، تقدر تقول صداقة عمر، وهذه أول مرة نعمل معا أنا وطارق رغم الصداقة الكبيرة، وكانت ثالث مرة تقريبا أعمل مع خالد فكان شيئا لطيفا جدا.

 فيه ناس انتقدت أداء البعض بإنه قلب محاضرات فى الآخر وخصوصا نبيل الحلفاوى؟

أنا مقدرش أصادر على رأى ناقد ولا حتى مشاهد لكن أكيد برضه مش أنا اللى هيدافع عن الأستاذ نبيل الحلفاوى بعد كل التاريخ ده بس من واجبى أقول إن كل واحد بيشوف العمل من ناحيته يعنى زى ما فيه ناس قالت كده تعالى اوريك آراء ومحاضرات على السوشيال ميديا عن أداء وبساطة الأستاذ الحلفاوى وإعجابهم الكبير بدوره.. آلاف اللايكات والشير لمشاهده علشان كده باقولك بلاش ناخد كلام فئة معينة على إنه اتجاه وفى نفس الوقت منقدرش نصادر على أى نقد بالعكس دى ظاهرة صحية جدا وفى مصلحة أى عمل سينمائى أو درامى.

•    فتحى .. انت فين والسينما فين؟

•    أنا أهو والسينما على آخر الشارع.. يضحك بصوت عالٍ

•    ده آخر كلام عندك؟

•    السينما محتاجة تدخلات أكبر مننا لأنها بتواجه صراعات معينة من جهات الإنتاج لكنى واثق إنها ستكون بخير فى النهاية لأنها من أهم الفنون لأى ممثل .. وبعدين ياما مرت عليها أزمات وبترجع تقوم وتبقى زى الفل وأنا واثق فى ده وعن نفسى باقيس كل اللى بيتعرض عليا بنفس المقاييس .. ورق ودور ورسالة لطيفة وباوافق طالما إنى راضى عما أقدمه سواء سينما أو مسرح أو دراما.

•    كل سنة وانت متألق يا جوكر العرب

•    كل سنة وكل العرب بخير وسعادة